Speech of
Mar Roxas
at the Event with Baybay City Barangay Officials
Baybay City, Leyte
[December 20, 2015]

Maupo po tayong lahat. Thank you very much.

Daghang salamat! Madamo gid na salamat! Maraming-maraming salamat sa isa sa pinakamahusay, pinakanirerespeto, pinakamakulit na kongresista sa ating buong bansa, ang inyong kongresista, Congressman Boying Cari. Palakpakan natin siya. [Palakpakan]

Alam n’yo po, si Cong. Boying, nasabi ko na makulit. Totoo po iyan. Every week, lingo-linggo, may text, may tawag, may sulat, may fax, may email sa kaka-follow up ng inyong pangangailangan dito sa inyong lugar sa Baybay at sa buong distrito. Maraming salamat, Boying. Maraming salamat, Boying, sa inyong serbisyo at sa iyong pagmamahal sa iyong mga kababayan. [Palakpakan]

Alam n’yo, panahon ng Pasko ngayon—at Boying, sa personal ha, personal, Boying—ito ‘yung Pasko na malungkot na malungkot si Boying, di ba? Kasi ang Pasko, kasama ang pamilya. Kaya iparamdam natin kay Boying na hindi siya nag-iisa at mahal na mahal natin si Boying. [Palakpakan]

Of course, sa ating minamahal, kung sa amon pa na Ilonggo, “ginapalangga”—ang akon na Bisaya, Inilonggo na Bisaya, kasi hindi kita mainchindihanay. [Tawanan] Makaintindi man ako, makasabot man ako, lisud lang masulti. Ha, okay? [Palakpakan] Pero binabati ko ang ating mahal na mahal, talaga namang espesyal ito, na kung saan, sabi nga ni Secretary Icot, sabi niya sa akin, nakaupo kami, “Aba, mukhang ginanahan si Tita Carmen ah. Kasi talagang ang ganda ng kanyang welcome message.” Sabi ni Secretary Icot, “Alam mo, kahit ako, Secretary na, kahit ikaw, magiging Pangulo na, kahit si Mic, gobernador na, kahit si Boying ay Congressman na, kahit si Sandy, Pangulo ng Mayor’s League na, ang tingin ni Tita Carmen sa ating lahat, mga bata-bata, kayang-kaya niya kaming lahat.” We love you, Tita Carmen! Merry Christmas sa ‘yo. [Palakpakan]

Gusto ko rin batiin ang isa sa pinakamahusay, pinakamasipag, at pinakaepektibo na Secretary sa gabinete ni Pangulong PNoy. Sino dito ang may kuryente na sa bahay? Taas ang kamay. May kuryente? Lahat! Lahat, may kuryente. Heto siya, quiet worker. Quiet worker. Hindi nagtataas ng bangko, pero nakita ko kung gaano niya ipinaglaban, kung gaano siya kapursigido, na siniguro niya na hindi tayo pinagsasamantalahan ng mga gumagawa ng kuryente at nagta-transmit ng kuryente. Nilabanan niya silang lahat. Palakpakan po natin, mahalin po natin, Secretary Icot Petilla. [Palakpakan]

May pakiusap ako sa inyo. Ang pakiusap ko, itong kapatid natin na si Icot, alam ko mananalo siya dito sa pagkasenador. Sigurado iyan. Tama? [Palakpakan] Pero, ang pagiging senador, sa buong Pilipinas iyan. Kahit manalo siya dito, kailangan manalo din siya sa ibang lugar. Tama? Kaya pakiusap ko, siguraduhin natin na merong Icot Petilla sa Senado para ipaglaban niya na hindi tayo pagsasamantalahan ng mga gumagawa ng kuryente. Sulatan ninyo, i-text ninyo, tawagan ninyo ang lahat ng mga kamag-anakan sa buong Pilipinas na ikampanya din nila si Sec. Icot Petilla sa pagka-Senado. [palakpakan]

Binabati po natin—ito naman, naging partner ko ito. Dalawang linggo, hindi ako umuwi. Magkasama kami araw-araw noong panahon ng kalungkutan. Noong panahon ng trahedya ng Yolanda. Wala pa ang Yolanda, magkasama na kami, itong dalawang ito. Na kung saan ay ‘yung sa paghahanda, ‘yung sa paggagawa ng mga hakbang, ng mga prepositioning, lahat ng mga paghahanda, ginawa nila. Saksi ako. Napakaepektibo nitong dalawa. Unang-una, ang inyong gobernador, Governor Mic Petilla, palakpakan po natin. [Palakpakan] And of course, ang kanyang ka-tandem sa pagka-bise gobernador, Vice Governor Carlo Loreto. [Palakpakan] Classmate din ito, two weeks, araw-araw. And of course, ang Pangulo ng Mayor’s League sa buong Leyte, sa buong Pilipinas—isipin po ninyo, ang pangulo ng samahan ng lahat ng mayor sa buong Pilipinas, saan man sila nagmula, ang pinili nila ang inyong kababayan, walang iba po kundi Mayor Sandy Javier. Palakpakn din po natin. [Palakpakan]

Ito silang tatlo, si Mayor Sandy, si Gov. Mic, si Vice Governor Carlo—noong unang araw pa lang nang dumating si Yolanda, nagkita-kita kami. Madumi, pawis na pawis, hirap na hirap, pero sila ang nag-clearing ng kalye mula sa Sur paakyat tungo ng Tacloban. Kami naman ni Secretary Volts Gazmin ang nagtrabaho mula Tacloban pababa tungo sa Palo, sa Tagawan, sa MacArthur, sa lahat ng mga bayan, hanggang mabuksan ‘yung highway na iyan, marating natin ang ating mga kababayan. Palakpakan po natin silang tatlo. [Palakpakan]

Binabati rin po natin, Vice Mayor Mike Cari. Palakpakan po. [Palakpakan]

ABC President Toto Avila. [palakpakan]

Members of the Provincial Board of Leyte, palakpakan po natin sila. [Palakpakan]

Board Member Boboy Gasis and Attorney Junjun Gayuda. [Palakpakan]

Ang ating mga Mayor. Of course, nabanggit nga si Mayor Sandy Javier. Binabati din natin ang Mayor ng Bato, Mayor Nael Gertos. [Palakpakan]

Mayor Loloy Lumarda ng Inopacan. [Palakpakan]

Mayor Daisy Lleve ng Mahalpag, palakpakan po natin. [Palakpakan]

Mayong Bentong Villahermosa ng Hilongos, palakpakan din po natin. [Palakpakan]

Congresswoman Noel ng An Waray Party List, palakpakan din po. [Palakpakan]

Of course, ang ating mga City Councilors, palakpakan po natin silang lahat. [Palakpakan]

At kayo po, kayo na mga nasa frontline. Kayo na unang takbuhan ng ating mga kababayan. Kayo, ng lahat ng problema, kayo ang unang hantungan. Pati problema ng mag-asawa, kayo ang pinupuntahan. Kayo na nagtataguyod ng kaayusan, ng kaunlaran, ng maganda at maayos na pamamahala sa bawat barangay dito sa Baybay, palakpakan po ninyo ang inyong sarili. [Palakpakan]

Sa ating lahat po, magandang-magandang tanghali at Merry Christmas sa ating lahat. [Palakpakan]

Unang-una ay gusto ko pong magpasalamat. Maraming-maraming salamat sa napakainit na pagtanggap po ninyo sa akin. Nang pumasok po ako rito, plantsado itong aking t-shirt, naka-tuck in. Ngayon ay hindi ko na ma-ispeling, pero proud na proud ako na ito ang inyong pagtanggap sa akin. Maraming-maraming salamat sa inyong lahat! [Palakpakan]

Feel na feel ko ang init ng inyong pagtanggap. At natutuwa naman po ako na ginanap ito, itong “Barangay Night,” sa oras ng tanghali. [Tawanan]

Kaninang umaga, nang naghahanda ako na magbiyahe papunta dito, tinanong ako bigla ng misis ko. Sabi niya, “Saan ka papunta?” Sabi ni Ate Korina ninyo na, “O, aalis ka na naman? Linggo ngayon ah! Saan ka papunta?” “Pupunta ako sa Leyte, sa Baybay.” So tumahimik siya. Di sige, patuloy ako sa pag-aayos. Nang paalis na ako, sabi niya sa akin, “O, mag-ingat ka ha.” “Bakit ako mag-iingat?” Sabi ko, ‘May bagyo ba? Wala na. Wala na ‘yung bagyo, umalis na.” “Hindi. Walang bagyo. Pero alam ko maraming magaganda diyan sa Leyte ha.” [Hiyawan]

Kaya sabi ko naman sa kanya, “Mabuti naman na yung Barangay Night, ginawang tanghali kasi kung gabi ito, mag-o-overnight pa ako diyan. Lalong hindi mo ako papayagan.” [Tawanan]

Kaya natutuwa naman ako na makita kayo. Actually, hindi ko alam kung mas gusto ninyo ito o hindi, pero sabi ni Cong. Boying sa akin, isa sa mga dahilan kung bakit ginawa nilang tanghali ‘yung “Barangay Night” para kahit umiinom, kahit may beer, kahit may alak, lahat makakauwi nang ligtas at nasa maayos na kalagayan. [Palakpakan]

Eh panahon ng Pasko ngayon, di ba? Gusto natin walang aksidente. Gusto natin lahat, maayos. Gusto natin, kapiling natin ang ating pamilya nang buong-buo. Palakpakan po natin. Mabuhay ang Lungsod ng Baybay! [Palakpakan]

Tuwing Pasko, noong batang-bata pa ako, parati kong naiisip, ano kaya ang ireregalo sa akin ng aking magulang? Di ba may kasabihan, “Are you good or bad?” Gumagawa daw ng listahan si Santa Claus. So parati kong tinatanong iyon. Ano kaya? Noong batang bata ako, gusto ko ‘yung regalo ko, ‘yung parang pang-cowboy na sumbrero Pagkatapos no’n, ‘yung laruan na sasakyan ng bumbero. Pagkatapos no’n, bola, pang-basketball. Habang tumatanda ka, habang lumalaki ako, nag-iiba ang ating nais na matanggap bilang regalo sa Pasko.

Pero naisip ko, pagdating sa pamamahala, dapat ang kaunlaran, dapat ang kasaganahan, dapat ang programa at proyekto, hindi parang Pasko. Dapat regular na dumadating iyan sa bawat barangay, sa bawat lungsod, sa bawat bayan ng ating buong bansa. Kaya babaguhin natin ang sistema. Babaguhin natin ang sistema, at nagtataguyod po tayo, sa ilalim ng Partido Daang Matuwid, ang programang tinatawag na Walang Iwanan Fund.” Walang Iwanan Fund. Pondo ito sa halagang isang daang bilyong piso, na kung saan ang bawat bayan, ang bawat barangay ay may parte dito. May parte para kayo ang magsasabi, saan gagastusin ito. At kayo rin ang magpapagawa ng bawat isang programang ito. Okay ba iyon? [Palakpakan]

Bibigyan ko kayo ng halimbawa ha. Nandito ang ating mga mayors. Simpleng-simple po ito. Halimbawa, sa bayan ng Bato, si Mayor Nael Gertos. Sa bayan ng Bato, 44,000 ang mga kababayan natin doon, di ba? Dito sa Baybay, 120,000 ang nakatira dito sa Baybay. So sa bawat bayan, sa bawat barangay, may bilang ng tao na nakatira doon. Tama? Tama. Simpleng-simple lang po ito. Ang kagandahan nito ang simpleng-simple. Multiplied by 1,000 pesos. Ibig sabihin, kung 44,000 ang nakatira sa bayan ng Bato, 44,000 times 1,000 pesos equals 44 million. At dito naman sa Baybay, kung 120,000 ang tao na nakatira dito time 1000 ay 120 million. Di ba? So iyan ang mangyayari sa bawat lugar ng buong Pilipinas. Ang Bato, P44 million ang matatanggap niya na programa at proyekto sa bawat taon. Iyan ang mangyayari diyan. [Palakpakan] Dito naman sa Baybay, 120,000 ang tao, times P1,000, P120 million ang matatanggap dito sa Lungsod ng Baybay. [Palakpakan]

Kaya hindi kinakailangan na mangulit pa si Congressman Boying. Hindi kinakailangan na sumipsip. Hindi kinakailangan na sumulat. Hindi kinakailangan na sumulat pa ng mga resolusyon ang ating mga barangay officials dahil garantisado na ganoong halagang pera ang dadating dito para taon-taon, may progreso na mararamdaman, may progreso na talagang dadating, may kaginhawaan na matatamasa ang bawat barangay, ang bawat pamilya dito sa Baybay at sa buong Pilipinas. Iyan ang ating programa. [Palakpakan]

Simpleng-simple lang po iyon. Isang daang milyong Pilipino sa buong mundo. Isang libong piso means P100 billion. Iyan ang halaga na itatabi natin sa budget ng Pilipinas, at iyan din ang halaga na ida-download, ibababa sa bawat barangay, sa bawat bayan para makakasiguro tayo na walang maiiwanan. Lahat kasama sa kasaganahan, lahat kasama sa kaunlaran. Palakpakan natin ang ating Walang Iwanan Fund. [Palakpakan]

Ibig sabihin, taon-taon, ang bawat barangay, ang bawat isa sa inyo, maido-drawing ninyo mula diyan sa 120 million na parte ng Baybay, kung ano ang gagawin ninyo. ‘Yung mga hindi pa nakakabit sa potable water, magkakatubig na. ‘Yung mga malalayong lugar na hindi pa nakabit sa kuryente, makakabili ng poste, transformer, at wire. ‘Yung mga nangangailangan ng farm-to-market roads, may pagkukunan na. ‘Yung pangangailangan ng bawat komunidad, siguradong matutustusan dahil itong perang ito ay dagdag doon sa IRA na pangkaraniwang natatanggap ng ating local government unit. Palakpakan natin ang ating Walang Iwanan Fund. [Palakpakan]

Kaya po sa mga darating na mga taon, sa ating pagpapatuloy ng Daang Matuwid, ng tama, wasto, malinis na pamamahala, ito ang kaunlaran na mapaparating natin sa bawat isa sa mga barangay na nandito ngayon. Walang maiiiwanan. Lahat, kasama. Walang pilian. Walang sipsipan. Lahat, makakasiguro na hindi namin kayo pababayaan. Sigurado kasama lahat. [Palakpakan]

Iyan po ang mensahe ng Pasko na nais kong paratingin sa inyo ngayong araw na ito: na ang Pasko, tama po, December 25, isang araw. Ang spirit ng Pasko, marahil, isang buwan, buwan ng Disyembre hanggang Enero. Pero pagdating sa programa, pagdating sa serbisyo, pagdating sa Daang Matuwid, ang kaginhawaan, ang kasayahan, ang progreso ng bawat pamilyang Pilipino ay magiging araw-araw dahil sisiguraduhin natin na walang maiiwanan. Lahat kasama sa ating progreso.

Mabuhay kayo lahat! [Palakpakan] Mabuhay ang Baybay! Merry Christmas and a Happy New Year sa inyong lahat! Maraming salamat po! [Palakpakan]