Speech of
Mar Roxas
at the Farmers Field Day Graduation
Sablayan, Occidental Mindoro
[November 15, 2015]

Magandang-magandang umaga sa ating lahat. Mabuhay ang Sablayan! Mabuhay ang Mindoro Occidental!

Maraming-maraming salamat sa isa sa pinakahinahangaan, isa sa pinakanirerespeto, isa sa pinakakinikilala ng ating Pangulo at ng buong Kamara de Representante bilang isa sa pinakamahusay, maayos, matino, malinis na kawani na kabahagi ng Kamara de Representante, Congresswoman Nene Sato. Palakpakan po natin siya. [Palakpakan]

Ma’am Nene, malaking karangalan sa akin na ikaw, isang hinahangaan ko, ang siyang nagpakilala sa akin sa iyong minamahal na kababayan. Maraming-maraming salamat po, Ma’am Nene. [Palakpakan]

Isa sa pinaka-Top 3, Top 3, sa lahat ng gobernador sa buong Pilipinas—sabi ng Pangulo, isa siya sa Top 3 na gobernador. Ang inyong gobernador na mahusay, epektibo, at maayos ang pamamahala. Sabi ng Pangulo nga, Top 3, top 3 sa pagkakulit sa Pangulo dahil madalas niyang ma-text ang Pangulo sa iyong mga pangangailangan. Ang ating gobernador, Gene Mendiola, palakpakan po natin. [Palakpakan]

Of course, sa ating mga host dito po sa bayan ng Sablayan, ang ating napakahusay—kasi sa totoo lang, kakaiba itong bayan ng Sablayan. Isa isa ito sa top na mga bayan na pinakamalawak ang area, ang lupain. Kaya kung ang ibang mayor ay mas maliit ang kanilang tinututukan, ito naman ang inyong mayor, napakahusay. Kahit malawak, natututukan po lahat. Mayor Ed Gadiano, palakpakan po natin. [Palakpakan]

Vice Mayor Andy Dangeros, palakpakan; [palakpakan] sa iba’t ibang miyembro ng Sangguniang bayan, palakpakan po natin sila; [palakpakan] ang lahat ng ating mga kapitan sa pamumuno ng ABC president, Ma’am Edna Mintu, palakpakan po natin; [Palakpakan]

Of course, lahat ng ating samahan, mga miyembro ng samahan ng magsasaka, mga irrigators, mga mangingisda, mga 4H club, mga kooperatiba—lahat lahat po ng mga kababayan natin dito sa Sablayan at sa buong Mindoro Occidental:

Mabuhay po kayo at magandang-magandang umaga sa inyong lahat. [Palakpakan]

Malaking karangalan po para sa akin na maimbita ng isa sa pinakaimortanteng miyembro ng gabinete ng pamahalaan ni Pangulong PNoy. Kung wala siya, kung wala kayo, wala din kaming lahat. Magmula sa inyo ang buhay ng buong sambayanang Pilipino. Nandoon siya sa gabinete, ipinaglalaban ang irigasyon, ang farm-to-market roads, ang post-harvest facilities, ang mga certified seeds, ang lahat ng pangangailangan ng mga magsasaka. Secretary Procy Alcala, palakpakan po natin. [Palakpakan]

Kaya Manong Procy, malaking karangalan para sa akin.

Alam niyo po, nagsimula itong imbitasyon na ito, magkatabi kami ni Manong Procy sa isang pulong ng gabinete. At dumating na, nagsimula ang meeting, alas diyes. Dumaan ang pananghalian, Sky Flakes. Dumaan ang hapon, ayon, tuloy pa rin ang meeting. Hanggang dumating na kami sa alas tres, alas kwatro ng hapon. Doon dumating ang pananghalian, alas tres, alas kwatro. Napansin ni Sec Procy na ‘yung takal ng kanin, lahat, isa, isa’t kalahati. Ako, dalawang takal ang hiningi ko. Sabi niya sa akin, “Mauubos mo ba iyan?” Sabi ko, “Alam mo Sec. Procy, ako, sa kanin, iyan talagang importante. Kahit wala nang ulam, kahit konting maalat na itlog at kamatis, basta may kanin na mainit, ok ako roon.” So sabi niya sa akin, “Naku, Sec. Mar, kailangang imbitahin kita, ipakilala kita sa mga nagsasaka ng ating kanin na siyang nagbibigay sa buong sambayanan ng kanin para sa ating agahan, pananghalian, at hapunan, ang mga magsasaka dito sa Mindoro Occidental.” Mabuhay po kayong lahat! [Palakpakan]

Malaking karangalan po para sa akin dahil tulad ng nasabi ko kanina, kung wala po kayo, wala din ang ating sambayanan. Magugutom ang lahat ng Pilipino kung wala ang mga magsasaka dito sa Occidental Mindoro. Mabuhay ang mga magsasaka! [Palakpakan]

Kaya tuwang-tuwa po ako na makabahagi ng ating okasyon na kung saan ang mga pangangailangan ng mga magsasaka, ‘yung mga hand tractors, ‘yung mga shallow pumps, ‘yung mga iba’t ibang gamit na maaaring magpalaki ng inyong aanihin, ay ngayon, sa pamamagitan ng pag-graduate mula sa Farm Academy, sa pamamagitan ng pagkilala ng ating mga Gawad Magsasaka, sa pamamagitan ng ating pagpupulong, nakikita po natin na pinaparangalan natin, nilalagay natin sa tama ang ating pagkilala sa napakalaki, napakahalagang kontribusyon ng mga magsasaka sa ating lipunan. Mabuhay po kayong lahat! [Palakpakan]

Kaya sa okasyonng ito na nagkataon, ito po ‘yung Foundation Day ng Occidental Mindoro, parang “happy birthday,” ito po ‘yung araw na kung saan yung dating iisang lalawigan ng Mindoro ay hinati, nagkaroon ng Mindoro Oriental, Mindoro Occidental. At sa ganoong paraan, nagkaroon ng mas direktang pagtutok sa ating mamamayan dito sa Occidental.

Natutuwa po ako na makita na masiglang masigla ang hanay ng mga magsasaka. Natutuwa po ako na makita na sa kabila ng lahat ng mga unos, mga bagyo, mga kalamidad, lahat ng hinaharap, lahat ng mga hamon na hinarap ng ating magsasaka, nandiyan pa rin kayo, hindi natitinag, hindi tumitiklop, matapang na hinaharap ang inyong magandang kinabukasan. Palakpakan po natin ang hanay ng magsasaka. [Palakpakan]

Kaya maaasahan po ninyo na sa pagpapatuloy ng Daang Matuwid, ang all-out support ng pamahalaan ay itutuloy din po natin para sa inyo. Ang ating Daang Matuwid po ay nakatutok sa bawat pamilyang Pilipino, lalong-lalo na ang mga pamilya ng magsasaka. Ang mga pamilya na nasa laylayan, ‘yung mga hirap na hirap, ‘yung mga talagang dehado at kung minsan, hindi nakakasabay sa agos ng panahon. Nakatutok po tayo para mapanghawakan po ninyo ang inyong kapalaran.

Nagpapasalamat po tayo sa kay Sec. Procy, sa lahat po ng mga kabahagi ng agriculture sector. Nandito po ang ating provincial agriculture officer, palakpakan po natin siya, tumayo po tayo. Ang municipal agriculture officer na talaga namang hindi pa kami nakapagkape kaninang umaga ay nagbigay na ng lista ng mga pangangailangan ninyo dito sa Sablayan. Palakpakan po natin! [Palakpakan]

Ma’am, champion po kayo. Lahat ng sinumbit [submit] po ninyo, tatrabahuin natin at ni Sec. Procy para matugunan ang mga pangangailangan natin dito sa Sablayan.

At kung may kanin, siyempre, maganda kung meron ding isda. Saan ang mga mangingisda rito? Taas ang kamay! Ayon! Of course, alam natin na coastal ang lalawigan ng Occidental Mindoro, at napakahalaga din ang paghahanap-buhay ng ating mga mangingisda. Tulad ng mga magsasaka, isang kahig, isang tuka. Napakahirap ng buhay. Kaya may nakita po ako sa ibang lalawigan na nais kong dalhin dito, at nandito si Sec. Procy, may magandang idea na gaganapin natin dito para sa ating mga mangingisda.

Sec. Procy, nakita ko ito sa Pangasinan, na kung saan ang mga mangingisda, nakatanggap ng mga fish finder. Ito ;yung parang radar na nakikita kaagad ang mga isda. Hindi pabalik-balik, hindi nauubos ang gasolina, naaaksaya ang pera sa kakahanap ng isda. Dahil dito sa maliliit na fish finder, nakikita nila kaagad kung nasaan ang isda, rekta sila doon, nahuhuli ang isda, balik sa puwerto, benta kaagad ang isda, hindi pa tunaw ang yelo. At sa ganoong paraan, mas mataas ang presyo sa huli ng ating mga mangingisda, malaki ang kikitain, malaki ang take home, maraming beer at gin ang mabibili sa dulo. [Tawanan] Palakpakan po natin ang ating mangingisda! [Palakpakan]

Sec. Procy, nakita ko iyang fish finder, BUB ‘yun, BUB project, pero palagay ko ay maii-adopt natin dito.

Sa inyong lahat po, naalala ko, noong ako po’y tumatakbo sa pagkasenador, pumunta rin po ako rito sa Occidental Mindoro at nagkaroon ng rally isa isang gym tulad nito. Punong-puno ng tao. Maraming-maraming salamat na ginawa ninyo akong Number One senator dito sa Occidental Mindoro. [Palakpakan]

Noong panahong iyon, sa rally, siyempre lahat ng kandidato dumating, nagbigay ng prisentasyon, nagpakilala kung ano ang plataporma. Nagsimula iyon, mga alas siyete ng gabi. Eh sa dami ng kandidato, habang nagsasalita ang bawat isa, isa-isa, dala-dalawa, lima-lima, tumatayo ang tao, lumalabas, umuuwi. Eh ang pangalan ko, “R,” Roxas. Nasa dulo. So siyempre nangamba ako. Tanong ko sa emcee, “Emcee, eh unti-unti, tumatayo ang tao, lumalabas, umuuwi. Eh nasa dulo pa ako, ‘R.’” Ang sabi ng emcee, “Huwag kang mabahala. ‘Yung mga tumatayo at umuuwi, mga kumbinsido na iyan. Ang kailangan mong kausapin yung mga natitira pa rito sa gym.” So sige, ang bawat kandidato, nagsasalita, lokal, nasyunal, ganoon. Hanggang dumating ang turno ko, alas-onse y media ng gabi. Gabing-gabi na, halos hatinggabi. Eh magmula sa punong-punong gym tulad nito, punong-puno ng tao, dadalawampu na lang ang naiiwan sa audience. Sabi ng emcee, “Okay, kumbinsido na silang lahat. Itong 20 na lang ang kailangan mong kausapin.” Kaya sige, nagpakilala ako, nagprisenta ng plataporma, hanggang unti-unti, ‘yung 20, tumayo din, lumabas, at tatlo na lang ang naiiwan sa audience. Hatinggabi na. Hindi na ako makapagpigil. Sabi ko, “Mister, mga kababayan ninyo, punong-puno itong gym na ito. Nakumbinsi sila isa-isa. Bakit ho ba kayong tatlo ay matapos ng limang oras ng pagdidinig sa mga pagpapakilala at saka sa plataporma, hindi pa kayo nakukumbinsi?” Aba’y sabi ng tatlo, “Sir, sa totoo lang, antemano pa, sa simula pa lang, kumbinsido na kami. Kami nga nagpahiram, libre, ng sound system na iyan.” So sabi ko, “Eh bakit hindi pa kayo umuuwi?” “Eh hindi kami makauwi hanggang matapos kang magsalita.” [Tawanan]

Kaya nakikita ko, dilaw na dilaw ang ating buong gym. Kaya nais ko kayong matanong, kumbinsido na ba kayo? [Mga tao: Oo!]

Iniimbita ko po kayo, hinihingi ko po ang inyong tulong na magpatuloy tayo sa Daang Matuwid. Nakikita natin, palakpakan po natin ang Daang Matuwid. [Palakpakan]

Nakikita po natin ang pagkalinga, ang pag-aruga, ang pag-asikaso, ang pagtutok ng Daang Matuwid sa bawat pamilyang Pilipino lalong-lalo na sa ating magsasaka at sa ating mga mangingisda. Importante po ito dahil walang tagumpay ang pamahalaang national kung hindi rin po kayo matagumpay sa inyong mga pamumuhay. Wala po kaming maipagmamalaki kung kayo din po ay hindi nakakaahon mula sa kahirapan at maiiwasan ang pagpapamana ng kahirapan sa inyong mga anak.

Magmula sa 4Ps—sino rito kabahagi ng 4Ps? Taas ang kamay. Ayan! Magmula sa 4Ps, na kung saan ang bawat isa sa inyong mga pamilya ay nabibigyan ng tulong para maisakatuparan na makita ninyong magga-graduate ang inyong mga anak, na siyang pangarap ng bawat magulang: Mag-graduate ang ating mga anak. Palakpakan po natin ang 4Ps! [Palakpakan]

Iyang 4Ps na iyan, sa Daang Matuwid, dedepensahan natin iyan, hindi tayo papayag na mawawala iyan, lalo pa natin papatibayin iyan at papalawakin para lahat ng pamilyang Pilipino ay makabahagi sa 4Ps program.

Iyan ang Daang Matuwid, ipinaglalaban, kaliwa’t kanan. Sa kaliwang kamay, merong 4Ps na tulong mula sa pamahalaan maitawid mula sa kahirapan ang ating mga pamilya. Sa kanang kamay naman, pagkakataon, konkreto, pinanghahawakang tulong para may magawa tayo at mahawakan natin ang ating kapalaran para sa ating magandang bukas. Palakpakan po natin ang Daang Matuwid. [Palakpakan]

Hindi na po ako magpapahaba, nauubusan na po ako ng boses. [Tawanan]

Nagpapasalamat lang po ako sa pagkakataong ito na makilala kayo, makaharap kayo, makadaupang-palad kayo, at makapag-picturan kasama ninyo. Hinding-hindi ko po kayo malilimutan.

Maraming-maraming salamat [palakpakan] sa inyong mainit na pagtanggap sa akin ngayong umaga, lalong-lalo na ‘yung mga nagpa-picture. Alam n’yo po, Ma’am Nene, sana may kopya ako ng picture dahil pag-uwi ko mamaya ay ano pong paliwanag ko sa Ate Korina ninyo pag nakita na niya ‘yung mga lipstick sa kuwelyo ko? [Hiyawan at tawanan] Ipapakita ko, “Ate Korina, hindi po ano iyan, galing sa mga kababayan natin sa Sablayan, Occidental Mindoro iyan.” Okay ba? [Mga tao: Okay!]

Maraming salamat! Mabuhay po kayo lahat! Congratulations sa ating mga pinaparangalan at happy birthday, Occidental Mindoro. Mabuhay! [Palakpakan]